Ղավրուման դարձել է 17 հոգու թունավորման պատճառ

Երեք օր առաջ Արտաշատի թիվ 2 դպրոցի մանկավարժական կոլեկտիվի էքսկուրսիան դեպի Տաթեւ լավ ավարտ չունեցավ: Տունդարձի ճանապարհին, կեսօրից հետո կտրուկ վատացել է բոլորի ինքնազգացողությունը, եւ նրանց թունավորման ախտանիշներով անմիջապես տեղափոխել են Գորիսի Յոլյանի անվան հիվանդանոցի ինֆեկցիոն բաժանմունք:

“Թունավորվածները 17 հոգի են, որոնցից 2-ը երեխաներ են: Հոսպիտալացնելու պահին նրանցից շատերի վիճակը եղել է ծանր, մեկն անգամ անգիտակից, միայն 4 հոգու ինքնազգացողություն է բավարար եղել, սակայն նրանց նկատմամբ էլ ապահովության համար իրականացվել են կանխարգելիչ միջոցառումներ: Ձեռնարկված բոլոր հնարավոր միջոցների արդյունքում նույն օրը ուշ երեկոյան արդեն բոլորը դուր են եկել այդ վիճակից”, - ասում է հիվանդանոցի փոխտնօրեն Լեւոն Հարությունյանը:

Ըստ բժշկի, թունավորվածների կյանքին արդեն վտանգ չի սպառնում, նրանց առողջական վիճակը բավարար է: Հնարավոր է մոտ ժամանակներս դուրս գրվեն հիվանդանոցից եւ բուժումը շարունակեն ամբուլատոր պայմաններում:

Մարզի սանիտարական գլխավոր բժիշկ Լենա Մալինցյանը բացառում է, որ թունավորման պատճառ կարող է լինել ջուրը: “Թունավորվածներն  օգտագործել են Տաթեւի եւ “Եղեւնուտ” հյուրանոցի ջուրը, որտեղ գիշերել են: Սակայն այդ ջրից օգտվել են շատ ուրիշներ եւս: Եվ ջուրը վարակի աղբյուր լինել չի կարող: Մեր ուսումնասիրություններով, հավանաբար թունավորման պատճառ է հանդիսացել ղավուրման, որից բոլորն են օգտվել: Այն իրենց հետ տուժողներն էին բերել Արտաշատից եւ  ավելի քան 12 ժամ մնացել էր առանց սառնարանի` արեւի տակ”, - ասում է Լ.Մալինցյանը:

Առայժմ սննդի մնացորդների փորձանմուշներն ուղարկվել են  հետազոտության, որի արդյունքները պարզ կլինեն 2-3 օրից: Իսկ կասկածելի ղավուրման պատրաստել էր էքսկուրսիայի մասնակցի կանանցից մեկը` Տաթեւ գալու նախորդ օրը:
 Գոհար Իսախանյան, Կապան

Կապանում կբացվի ռուսական գիմնազիա

Հունիսի 28-30-ը Սյունիք կատարած եռօրյա աշխատանքային այցի ընթացքում ՀՀ-ում ՌԴ արտակարգ եւ լիազոր դեսպան Վ.Ե.Կովալենկոն եւ մարզպետ Սուրիկ Խաչատրյանը ստորագրել են ՀՀ-ում ՌԴ դեսպանատան եւ ՀՀ Սյունիքի մարզպետարանի համագործակցության վերաբերյալ նկատառումների արձանագրություն, որով համաձայնություն է ձեռք բերվել ՀՀ Սյունիքի մարզի  Կապան քաղաքում ռուսերեն լեզվով դասավանդմամբ հանրակրթական գիմնազիա ստեղծելու վերաբերյալ:

Նախնական պայմանավորվածությամբ գիմնազիան կսկսի գործել եկող ուստարվանից: Որպես տարածք նախատեսված է տրամադրել քաղաքի Ձորք թաղամասի թիվ 13 հիմնական դպրոցի մասնաշենքերից մեկը:

Լինելով դպրոցում, դեսպանը ծանոթացավ պայմաններին: Նրա խոսքով, տարածքը գոհացուցիչ է, այստեղ կկատարվեն նորոգման աշխատանքներ, կտեղադրվեն համակարգչային տեխնիկա, գույք, կահույք:

“Ես համոզված եմ, որ Հայաստանում ինչքան շատ երեխաներ տիրապետեն լեզուներ, ծանոթ լինեն աշխարհի ժողովուրդների մշակույթին, գիտությանը, այնքան նրանք հարուստ կլինեն ու այնքան շատ օգուտ կտան իրենց հայրենիքին”, - ասաց դեսպանը:

ՀՀ-ում ՌԴ-ի դեսպանի սյունիքյան այցի ընթացքում ստորագրվել է նաեւ առեւտրատնտեսական, գիտատեխնիկական ու մշակութային համագործակցության համաձայնագիր` “Մեր բարեկամությունն ու համագործակցությունը գրավականն են այն դժվարությունների հաղթահարման , որոնք կան մեր երկրների միջեւ: Եվ եթե լինենք միասին, մեզ երբեք ու ոչ ոք չի կարող հաղթել: Դրանում համոզվելու համար պետք է հիշել մեր երկու ժողովուրդների պատմությունը”, - ասաց դեսպանը:

Գոհար Իսախանյան, Կապան

“Բնապահպանության առաջնորդների ճամբար” Կապանում

Դեռեւս անցած տարվանից Կապանի տարածաշրջանում իրականացվող “Երեխաները եւ իրենց ընտանիքները վայելում են ապահով կյանք եւ առողջ միջավայր” ծրագրի շրջանակներում օրերս Կապանի երեխաների խնամքի եւ պաշտպանության կենտրոնում կազմակերպվել էր “Բնապահպանության առաջնորդների ճամբար”, որում ընդգրկվել էին Կապան քաղաքի եւ տարածաշրջանի գյուղական համայնքների դպրոցների շուրջ 20 աշակերտներ:

Ծրագիրը համաֆինանսավորվում է ԵԱՀԿ մարզային ծրագրերի իրականացման Կապանի գրասենյակի եւ “Վորլդ Վիժն” բարեգործական կազմակերպության Կապանի տարածքային զարգացման գրասենյակի կողմից: Ճամբարի 5 օրերի ընթացքում, որտեղ երեխաները լինում էին օրական 7 ժամ, անցկացվել են բնապահպանական թեմաներով զրույցներ, խաղեր, մրցույթներ, դասախոսություններ, կազմակերպվել են էքսկուրսիաներ:

“Ճամբարականները տեղեկացվել են բնապահպանական խնդիրներին եւ դրանց լուծման ուղիներին, շրջակա միջավայրի պահպանությանը: Եղել են “Դինո գոլդ մայնինգ քամփնի” ՓԲԸ-ում, ծանոթացել կոմբինատի աշխատանքների արդյունքում առաջացող բնապահպանական խնդիրներին եւ դրանց նվազեցմանն ուղղված ձեռնարկության կողմից տարվող աշխատանքներին ու ծրագրերին:

Ճամբարականները եղել են նաեւ “Շիկահող” պետարգելոցում, “Սոսիների պուրակում”, այցելել Կապանի բնապահպանական տեղեկատվական “Օրհուս” կենտրոն եւ այլն: Ճամբարում ձեռք բերած գիտելիքները երեխաները կփոխանցեն իրենց հասակակիցներին”, - ասում է ծրագրի պատասխանատու Լուսինե Սարուխանյանը:

Ըստ նրա, իրականացվող ծրագրի շրջանակներում անցած տարի պատրաստվել եւ Կապան քաղաքում տեղադրվել են սոցիալական արտաքին գովազդ' բնապահպանական թեմայով, նաեւ պատվիրվել է էկոպայուսակների արտադրություն, որոնք այս տարի պետք է վաճառվեն եւ ստացված գումարով աշնանը իրականացվի ծառատունկ: Այս աշխատանքներին ԵԱՀԿ-ին ու “Վորլդ Վիժն”-ին կաջակցի “Դավիթբեկյան ուխտեր” ԵՀԿ-ը:

Սա Կապանում կազմակերպված այս տարվա առաջին էկոճամբարն էր, իսկ երկրորդը մեկնարկեց առաջինի ավարտից անմիջապես հետո` ամերիկյան “Խաղաղության կորպուսի” ֆինանսավորմամբ: Այս էկոճամբարի ծրագրի առաջարկը ներկայացրել են կազմակերպության Կապանի երկու կամավորներ: Ճամբարի 12-14 տարեկան 40 սաներն ընտրվել են մրցույթով` հարցաթերթիկների օգնությամբ, Կապանի թվով 5 դպրոցների 80 աշակերտներից: Ճամբարում երեխաների հետ կաշխատեն 8 կամավորներ, որոնցից 4-ը “Խաղաղության կորպուս”-ից են, 4-ը` “Վորլդ Վիժն”-ից: Այս ճամբարը եւս կաշխատի նույն սկզբունքով, ինչ առաջինը:

Ընթացիկ ամռանը Կապանում կազմակերպված երկու էկոճամբարների արդյունքում տարածաշրջանը կունենա բնապահպանության 60 առաջնորդ- դպրոցականներ:

Գոհար Իսախանյան, Կապան

Սա եղեռն է սեփական ժողովրդի դեմ

Որ կառավարության այս տարվա ապրիլի 28-ի N 627-Ն որոշմամբ իրենց գյուղը ճանաչվել է գերակա հանրային շահ եւ որոշվել է փոփոխել հողերի նպատակային նշանակությունը, ասել է թե` վերաբնակեցնել գյուղը, Քաջարանի գյուղապետ Ռաֆիկ Աթայանն իմացել է պատահականորեն` ինտերնետից:

Նրան այդ մասին չեն տեղեկացրել ոչ հարազատ կառավարությունից եւ ոչ էլ տարածքների ձեռքբերման իրավունքը վաստակած  “Զանգեզուրի պղնձամոլիբդենային կոմբինատ” ՓԲԸ-ից: Ի դեպ` կառավարության վերոնշյալ որոշումը վերաբերում է ոչ միայն Քաջարան գյուղին, այլեւ տարածաշրջանի եւս 5` Արծվանիկ Սեւաքար, Աճանան, Չափնի եւ Սյունիք համայնքներին: Եթե Քաջարանը հարակից է կոմբինատին, ապա վերջին հինգ գյուղերի վարչական տարածքում եւ հարեւանությամբ գտնվում է կոմբինատի հսկա թափուկատարը:

Կառավարության այս որոշումը ցնցել է քաջարանցիներին: “Ո՞ւր գնանք, այստեղ մեր պապերի, մեր ծնողների գերեզմաններն են, այստեղ մեր հողն ու ջուրն է, մեր տունն է: Եթե անգամ մայրաքաղաքում` Վահագնի թաղամասում, մեզ ապահովեն տներով, ո՞նց կարող են մեր թոշակառու գյուղացիներն այնտեղ ապրել` ընդամենը 30 հազար դրամ թոշակով”, - ասում է գյուղապետը:

Քաջարան գյուղը գտնվում է Զանգեզուրի լեռնաշղթայի լանջերից մեկում` ծովի մակերեւույթից 2040 մ բարձրության վրա: Այն բարձրադիր, սահմանամերձ գյուղ է, որից մինչեւ Նախիջեւանի սահմանն ընդամենը 4-5 կմ է: Գյուղն ունի 131 ընտանիք` 240 բնակիչ, որոնց հիմնական զբաղմունքը հողագործությունը, անասնապահությունն ու մեղվաբուծությունն են:

“Բնակչության զգալի մասը կենսաթոշակառուներ են` կոմբինատի նախկին աշխատակիցներ: Գյուղում են ապրում նաեւ մինչ 18 տարեկան 40 երեխաներ: Գյուղը դպրոց ու մանկապարտեզ չունի, երեխաները ուսում են ստանում հարեւան Քաջարան քաղաքի դպրոցներում, ուր նրանց ամեն առավոտ տեղափոխում են ավտոբուսներով: 131 ընտանիքներն էլ մրգով, բանջարեղենով, կաթնամթերքով, մեղրով, մսով եւ այլ մթերքներով օգնում են իրենց քաղաքում բնակվող երեխաների մինչեւ 2-3 ընտանիքների: Կարելի է ասել, այդ ընտանիքների հիմնական կերակրող ձեռքը մեր գյուղացիներն են”, - պատմում է գյուղապետը:

Կառավարության որոշման մասին իմանալուց հետո շուրջ 600 քաջարանցիներ նամակներով դիմել են ՀՀ նախագահին, վարչապետին, ԱԺ նախագահին, սակայն ոչ մի բավարարող պատասխան չեն ստացել:

“Ասում են 100 աշխատատեղ է բացվելու կոմբինատում, բա 1000 հոգու էլ սովա՞ծ են թողնում: Իրենք ունեն 400-500 տարվա պաշար, թող վայելեն, մեզանից ինչի՞ են խլում մեր տունը: Մեծ խոստումներ են տալիս, բայց համոզված ենք, ոչինչ էլ չեն անելու: Մենք պայքարելու ենք մինչեւ վերջ: Այսօրվանից էլ գյուղում ստորագրահավաք է սկսվել: Ո՞ւր գնան, որտե՞ղ ապրեն: Թվում է, թե վերջն է սա, իսկական եղեռն է սեփական ժողովրդի դեմ”, - վրդովվում է  գյուղապետը:

Այս հարցում վճռական են տրամադրված քաջարանցիները: Հունիսի սկզբներին գյուղացիները հետ են տվել աշխատանքներ իրականացնելու նպատակով գյուղ մտած տեխնիկային, իսկ դրանից առաջ էլ գյուղից հեռացրել են կոմբինատի մարկշեյդերին:

Խնդրի վերաբերյալ քննարկում է կազմակերպել “Ազատամարտ” կոմիտեն եւ “Կապանի տարածաշրջանի զարգացման” հիմնադրամը: Այստեղ հնչեցրած տեսակետները շատ էին, իսկ ամենակարեւորը հարցը որ առանձնացվեց եւ որին ընթացք պետք է տրվի այն է` ինչո՞ւ հանրապետության թիվ 1 հարկատուն` “Զանգեզուրի պղնձամոլիբդենային կոմբինատ” ՓԲԸ-ն իր ծրագրերը հանրային քննարկման չի ներկայացնում, որը օրենքի պահանջն է:

Ի դեպ, նման նախաձեռնությամբ մարզի 4 հանքարդյունաբերական ձեռնարկություններից հանդես է գալիս միայն “Դինո գոլդ մայնինգ քամփնի” ՓԲԸ-ը: “Մոռանում են, որ ընդերքը ժողովրդի հարստությունն ու սեփականությունն է, եւ իրենք ժամանակավոր են”, - ասում է “Ազատամարտ” կոմիտեի նախագահ Խորեն Հարությունյանը:

Գոհար Իսախանյան. Կապան

Կարեւորը մարդկանց անվտանգությունն է

Գազի անվտանգության ձայնաազդանշանային սարքերի տեղադրումը բնակարաններում ամենեւին էլ բարեհաճորեն չընդունվեց կապանցիների կողմից: Մեկը բողոքում էր, թե սարքն իզուր էլեկտրաէներգիա է խլում, մյուսը, թե տեղադրելիս նորոգած տունս փչացնում են, երրորդը սարքը միացնելու համար ազատ վարդակ չունի եւ այլն: Սակայն, բոլոր հարցերը մի կողմ թողնելով բնակիչները ստիպված համաձայնվեցին, քանի որ սարքի տեղադրումը պարտադիր էր ու այն չունենալու դեպքում բնակարանը գազազրկվում էր: Իսկ այսօր բոլո՞ր բնակիչներն են թողնում, որ սարքն աշխատի շուրջօրյա: “Ո՞վ ա իմանում, օրական 1-2 ժամ կամ միացնում եմ, կամ չեմ միացնում: Նախկինում որ չի եղել, գազ չե՞նք օգտագործել”, - արդարանում է 28-ամյա տնային տնտեսուհի Լիլիթը:

“Այս գործում կարեւոր է բացատրական աշխատանքը: Եթե քաղաքացուն բացատրում ես, թե ինչ նշանակություն ունի սարքը եւ հնարավոր է, որ այն մահից փրկի ողջ ընտանիքը, շատերը հասկանում ու ընդունում են”, - ասում է “Էյ ի Ջի Սերվիս” ՍՊԸ տնօրեն Գառնիկ Հակոբյանը: Ընկերությունը մարզում իրականցնում է գազի բաժանորդների անվտանգությանն ուղղված աշխատանքներ` հաշվիչից մինչեւ գազի սարքն ընկած հատվածում: Սյունիքում գազի անվտանգության ձայնաազդանշանային սարքեր արդեն ունեն 20 հազ. 511 բաժանորդ: Կան այսպես կոչված “փակ դռներ”, որտեղ եւս աշխատանքներ են իրականացվում անվտանգության սարքեր տեղադրելու համար: Նման բաժանորդները կազմում են 15 տոկոս: Տնօրենը հավաստիացնում է, որ իրենց աշխատողներն ապահովված են եւ տեխնիկայով,  եւ արտահագուստով: “Եթե մեր փականագործը ներկայանում է բաժանորդին ոչ պատշաճ տեսքով` առանց սափրվելու, առանց կրծքանշանի կամ անձնական քարտի, բնակիչն իրավունք ունի դուռը չբացելու եւ նրան ներս չթողնելու: Հնարավոր է մեր փականագործի անվան տակ հանցագործը մուտ գործի բնակարան”, - ասում է ընկերության տնօրենը: Բարեբախտաբար, մինչ այսօր նման դեպք մարզում չի եղել: Սյունիքում խնդիր է այն, որ օգտագործվող գազի սարքավորումների 60-70 տոկոսը 20-30 տարվա վաղեմություն ունի, եւ դրանցից շատերն արդեն պիտանի չեն օգտագործման համար: Սակայն, ելնելով բնակիչների սոցիալական վիճակից, ընկերության աշխատակիցները բնակիչներին չեն պարտադրում դրանք փոխարինել նորերով, այլ պարզապես ուժեղացնում է հսկողությունը, հաճախակի դարձնում այցելությունները: 2007-2008թթ. մարզում արձանագրվել է գազի ոչ ճիշտ օգտագործման արդյունքում 3 մահվան դեպք: Դրանից հետո մահացու ելքով դժբախտ դեպքեր չեն եղել: Արձանագրվել է միայն թունավորման 2 դեպք:

Գոհար Իսախանյան, Կապան

Սյունիքում վերընտրվում են ՀՀԿ-ական գյուղապետերը

Այս տարվա ընթացքում Սյունիքի 13 համայնքում անցկացվել են ՏԻՄ հերթական ընտրություններ: Առաջիկայում` օգոստոսի 21-ին Սիսիանի տարածաշրջանի Արեւիս համայնքում եւս տեղի կունենան համայնքի ղեկավարի եւ համայնքի ավագանու ընտրություններ:

Մարզի 8 գյուղական համայնքում կայացած համայնքի ղեկավար ընտրություններում վերընտրվել են գործող ՀՀԿ-ական գյուղապետերը, որոնց ընտրություններն անցել են առանց մրցակցության: Միայն Կապանի տարածաշրջանի Կաղնուտ համայնքում գործող ՀՀԿ-ական գյուղապետի հետ համայնքի ղեկավարի պաշտոնի համար պայքարել է ԲՀԿ-ական թեկնածուն, որն էլ պարտություն է կրել:

Նախորդ տարիներին մարզում եղել են դեպքեր,մ երբ նշանակված համայնքի ավագանու ընտրությունները չեն անցկացվել` բավարար քանակությամբ թեկնածուներ չլինելու պատճառով: Իսկ ավելի շատ են եղել դեպքերը, երբ ավագանու 5 անդամի փոխարեն առաջադրվել եւ ընտրվել է 4 թեկնածու: Սակայն այս տարի ավագանու ընտրություններն անցնում են մրցակցությամբ:

Օրինակ` Քարաշենում ավագանու 5 անդամի համար առաջադրվել էր 7 թեկնածու, իսկ Նորավանում` դարձյալ 5 տեղի համար թեկնածուները 6-ն են եղել: Մինչեւ տարեվերջ Սյունիքի եւս 5 համայնքում կանցակցվեն ՏԻՄ ընտրություններ` Չափնիում, Վաղատուրում եւ Աշոտավանում` համայնքի ղեկավարի, իսկ Նժդեհում եւ Ալվանքում` համայնքի ավագանու:

Գոհար Իսախանյան, Կապան

Պլան չեմ կատարել, մի 3000-անոց ակտ գրեմ

Երբ անցած տարվա ապրիլին վարչական դատարան է դիմել մի կապանցի ավտոտեսուչի կազմած 30-հազարանոց ակտը անվավեր ճանաչելու պահանջով, քչերն էին հավատում, որ խնդիրը կլուծվի օգուտ քաղաքացու: Սակայն դատարանը հայցը բավարարել է: Կապանցի վարորդների համար դա իրադարձություն էր, նրանք հավատացին, որ հնարավոր է իրենց իրավունքները եւս պաշտպանվեն: Սակայն այդ օրվանից մինչ այսօր քիչ բան է փոխվել: Նորից նույն կամայականությունները, նույն անտեղի տուգանքները շարունակվում են ավտոտեսուչների կողմից:

“Ամեն անգամ, երբ գյուղից քաղաք եմ գալիս տղայիս տուն թոռներիս տեսնելու, որտեղ էլ մեքենաս կանգնեցնում եմ, մեկ է, տեսուչը գալիս ու 3 հազար դրամ է ուզում, ասելով` մեքենադ սխալ տեղ ես կանգնեցրել: Իսկ երբ հարցնում եմ` բա էսքան մեքենաներ, որ կանգնած են, ասում է` դա քո գործը չէ: Էլ սովորություն եմ  դարձրել, հենց գալիս եմ, ինքս եմ, ավտոտեսուչին կանչում ու նրա “հասանելիքը” տալիս, - պատմում է 68-ամյա Հարությունը:

Կապանում արդեն սովորական է դարձել, երբ ավտոտեսուչը կանգնեցնում է մեքենան եւ խախտում չկատարած վարորդին ասում. “Պլան չեմ կատարել, մի 3 հազարանոց ակտ գրեմ, տար մուծի”: Վարորդներն էլ զզվանքով, սակայն կեղծ ժպիտով համաձայնվում են: “Այս երեւույթը, բնորոշ է միայն մարզերին, մայրաքաղաքում նման բան չկա, սակայն չեմ բացառում, որ Երեւանում եւս անտեղի տուգանքներ լինում են” - ասում է “Աքիլես” ավտովարորդների իրավունքների պաշտպանության կենտրոն ՀԿ ղեկավար Էդուարդ Հովհաննիսյանը, ով Սյունիքի հակակոռուպցիոն կենտրոնում կազմակերպել էր սեմինար` “ՀՀ Սյունիքի մարզի ավտովարորդների իրավունքների պաշտպանությունը” թեմայով:

Սեմինարի ընթացքում քննարկվեցին այն  խնդիրները, որոնք հաճախակի առաջանում են վարորդ-տեսուչ հարաբերությունների ժամանակ: Կարեւորվեց ճանապարհային երթեւեկության կանոնների եւ օրենսդրության իմացության մակարդակի բարձրացումը թե վարորդներիմ, եւ թե ավտոտեսուչների կողմից:

“Դեռեւս մարզի վարորդներից բողոքներ չենք ստացել, որոնք պարունակեն կոռուպցիոն տարրեր, սակայն ակնհայտ է, որ այս ոլորտում կան կոռուպցիոն ռիսկեր եւ հնարավորինս դրանք բացառելը կարեւորում եմ”, - ասաց Սյունիքի շահերի պաշտպանության եւ աջակցության կենտրոնի ղեկավար, Հայաստանի երիտասարդ իրավաբանների ասոցիացիայի մարզային մասնաճյուղի պատասխանատու Արշավիր Խալափյանը:

Սեմինարի ընթացքում ճանապարհային ոստիկանությանն ուղղված բազմաթիվ բողոքներից բացի, նշվեց նաեւ, այս ոլորտում վերջին երկու տարում, այնուամենայնիվ, որոշ դրական փոփոխություններ կատարվել են, ընդունվել են ենթաօրենսդրական մի շարք ակտեր, հատկապես վերջին շրջանում: “Արդեն հասել ենք նրան, որ հաշվառման, քննական բաժանմունքներն այլեւս կաշառք չեն վերցնում: Պետական նախատեսված մուծումներից բացի այլ գումարներ չեն պահանջում”, - ասաց Է. Հովհաննիսյանը:

Գոհար Իսախանյան, Կապան

Շուրջօրյա ջրամատակարարում Գորիսում

Տարիներ շարունակ օրական մեկ կամ երկու ժամ ջուր ստանալուց հոգնած գորիսեցին վերջապես ապահովվեց շուրջօրյա ջրամատակարարմամբ: Այս իրադարձությունը իսկական տոնի է վերածվել քաղաքի Մխիթար Սպարապետի անվան հրապարակում: Այստեղ հավաքված գորիսեցիներին շնորհավորանքի խոսքեր են ասել Սյունիքի մարզպետ Սուրիկ խաչատրյանը, “Հայջրմուղկոյուղի” ՓԲԸ տնօրեն Պատրիկ Լորենը եւ ուրիշներ: Հանդիսավոր միջոցառումն ավարտվել է բացօթյա տոնական համերգով:

Գորիսը շուրջօրյա ջրամատակարարմամբ ապահովելու աշխատանքները Հայջրմուղկոյուղին քաղաքում սկսել է դեռեւս 2008թ-ից` Ասիական զարգացման բանկի ֆինանսավորմամբ իրականացնելով երկու խոշոր ծրագիր` 760 մլն դրամ ընդհանուր արժեքով: Փոխվել է քաղաքի ջրամատակարարման ներքին ցանցի 40 տոկոսը, ինչը վերացրել է ջրի կորուստները: Ներկայումս, դարձյալ Ասիական զարգացման բանկի ֆինանսավորմամբ, նմանատիպ ծրագրեր են իրականացվում մարզկենտրոն Կապանում եւ Ագարակ քաղաքում: Ծրագրերի ավարտին մարզի այս քաղաքները եւս կունենան շուրջօրյա ջրամատակարարում:

Զարմանալի է, որ 2004թ-ից “Հայջրմուղկոյուղի” ՓԲԸ-ի կառավարումը ստանձնած ֆրանսիական SAUR կազմակերպությունը առաջին անգամն է, որ նման խոշոր ծրագրեր է իրականացնում Սյունիքում, չնայած մարզում ջրամատակարարումը միշտ էլ անմխիթար վիճակում է եղել: Ի դեպ, SAUR-ի կառավարման ժամկետը լրանցում է այս տարվա հոկտեմբերին եւ ընկերությունը բանակցություններ է վարում կառավարության հետ այն երկարաձգելու մինչեւ 2014թ-ը, որի ընթացքում խոստանում է ոչ միայն շուրջօրյա ջրամատակարարում, այլ նաեւ` որակյալ ջուր: Իսկ Կապանի քաղաքապետարանը, հաշվի առնելով բնակիչների դժգոհությունները, միջոցներ է ձեռնարկում քաղաքի ջրամատակարարումը համայնքային ենթակայության դարձնելու համար: Սրա նախադեպը կա Քաջարանում, որտեղ ջրամատակարարման գործընթացում այնպիսի լուրջ խնդիրներ, ինչպիսիք առաջանում են Կապանում, չեն լինում:

Գոհար Իսախանյան, Կապան

Խնձոր տատիկը...

Համով խնձոր տատիկ ...

Կապանցին դեռ կարողանում է գնահատել արժեքավորը

Դասական երաժշտության համերգները, ի տարբերություն հայ էստրադայի “աստղերի” շոուների, Կապանում սովորաբար անցնում են կիսալեցուն դահլիճներում: Չնայած նման համերգների մուտքը միշտ ազատ է լինում, հոգսաշատ կապանցիներից քչերն են նախընտրում երեկոյան ժամերը տրամադրել դասական երաժշտությանը: Սակայն այս անգամ այլ էր: Կապանի երաժշտական քոլեջի դահլիճում Արամ Խաչատրյանի անվան դաշնամուրային տրիոն էր:

Հանդիսականներով համեմատաբար լեցուն դահլիճը երաժշտական խմբի կատարումներն ունկնդրում էր քար լռությամբ, իսկ վերջում` արժանացնում բուռն ծափերի:

Հնչեցին Բրամսի, Բախի, Ա.Բաբաջանյանի, Էդ.Միրզոյանի, Ա.Խաչատրյանի եւ այլոց ստեղծագործությունները: “Մեծ պատիվ է մեզ` կապանցիներիս համար հյուրընկալել նման տաղանդավոր երաժիշտների ու հնարավորություն ունենալ ունկնդրելու բարձրաճաշակ երաժշտություն` փայլուն կատարողականությամբ”, - համերգի վերջում շնորհակալություն հայտնելով երաժիշտներին ասաց Կապանի արվեստի քոլեջի տնօրեն Լիաննա Հակոբյանը: Իսկ համերգը կազմակերպել էր Կապանի արվեստի քոլեջը եւ Դասական երաժշտության զարգացման հիմնադրամը:

“Վաղուց նման հաճույք չէի ստացել: Ուրախ եմ, որ Կապանում կա հնարավորություն` ունկնդիրը դառնալու դասական երաժշտության գոհարների: Հպարտությամբ նկատել եմ, որ դահլիճում քիչ չեն երիտասարդները: Իսկ դա խոսում է այն մասին, որ դեռ ամեն ինչ կորած չէ, որ կապանցին կարողացել ու կարողանում է գնահատել արժեքավորը”, - ասում է տիկին Ռամելան եւ խոստովանում, որ զբաղվածության պատճառով միշտ չէ, որ կարողանում է հաճախել համերգներ:

Օգտվելով առիթից, երաժշտական քոլեջի տնօրինությունը համերգի հաջորդ օրը կազմակերպեց Ա.Խաչատրյանի անվան տրիոյի ու քոլեջի ուսանողների հանդիպումը, որի ընթացքում այս անգամ կայացասծ երաժիշտները ունկնդրեցին ուսանողների կատարումները, իսկ վերջում նրանց փոխանցեցին իրենց մասնագիտական խորհուրդները:

Գոհար Իսախանյան, Կապան

Փլվել է կեսդարյա դպրոցի շենքը

Տեղ գյուղի թիվ 1 միջնակարգ դպրոցի երկհարկանի շենքն իր գոյության 52 տարիների ընթացքում ոչ մի անգամ չէր հիմնանորգվել, սակայն ոչ մեկի մտքով անգամ չէր անցնում, որ այն մի օր կփլվի: Դեպքը տեղի է ունեցել հունիսի 9-ին ժամը 14-ի սահմաններում եւ, Աստծո կամոք, չեն տուժել դպրոցի 240 աշակերտներից ու երեք տասնյակ աշխատակիցներից եւ ոչ ոք:

“Առավոտյան դպրոցում 9-րդ դասարանում մաթեմատիկայի քննություն ենք անցկացրել ու դեպքից կես ժամ առաջ աշակերտներն ու ուսուցիչները տուն էին գնացել, իսկ ես ընդամենը 10 րոպե առաջ էի դուրս եկել շենքից ու ամեն ինչ կատարվեց աչքիս առաջ:

Դպրոցի շենքը փլվել է միջնամասում` 26 մ երկարությամբ եւ 16 մ լայնությամբ մակերեսով: Շենքի առջեւի մասում դասասենյակներն էին, ետնամասում' նիստերի դահլիճը, իսկ առաջին ու նկուղային հարկերը զբաղեցնում էր մարզադահլիճը”,- պատմում է դպրոցի տնօրեն Սլավիկ Գրիգորյանը:

Դպրոցական գույքը, որը նորացվել էր 2008-ին Սոցներդրումների հիմնադրամի աջակցությամբ, եւս վնասվել է, այդ թվում նաեւ համակարգչային տեխնիկան: Սակայն հաջողվել է դրանց մի մասն անվանս դուրս բերել փլատակներից եւ ժամանակավորապես տեղավորել հարեւան Արավուս գյուղի դպրոցում:

2009-ից, պետբյուջեից տրամադրած գումարներով, Տեղ գյուղի դպրոցում առաջին անգամ նորոգման աշխատանքներ էին սկսվել, որոնք այդպես էլ չեն ավարտվել: Սակայն շինարարները հասցրել էին հիմնանորոգել շենքի տանիքը, փոխել դռներն ու լուսամուտները: Այս տարի 50 մլն դրամով նախատեսված էին դպրոցի մարզադահլիճի նորոգումն ու դասասենյակների ներքին հարդարման աշխատանքները:

Կատարվածը դժվար կացության առջեւ է կանգնեցրել դպրոցի կոլեկտիվին` դեռեւս ընթացքի մեջ են ավարտական քննությունները: Սակայն այս հարցի լուծումն արդեն գտել են: 3 օրից օտար լեզվի քննությունները կանցկացվեն գյուղի մշակույթի կենտրոնում, որն արդեն կահավորվել է համապատասխան ձեւով: “Կարեւորն այն է, որ ոչ ոք չի տուժել, մնացած բոլոր խնդիրները լուծելի են”, - ասում է տնօրենը:
Գոհար Իսախանյան, Կապան